- Çka preferohet të veprohet në dhjetë ditët e Dhul-Hixhës -
Falënderimi është për Allahun, ndërsa përshëndetjet tona për Muhamedin salallahu alejhi ve se-lem, familjen dhe shokët e tij.
Është veçanti e muslimanit që gjithmonë sezonat e hajrit t'i pres me pendim të sinqertë, kjo ngase Allahu nuk ia ka ndaluar askujt të mirat vetëm përshkak të mëkateve të tij, qoftë kjo e mirë e kësaj bote apo e fesë. Allahu [subhanehu ve teala] thotë: "Çfarëdo e keqe që mund t'ju godasë, ajo është pasojë e veprave tuaja (të këqija), e për shumë të tjera Ai u falë." [Shura, 30]
Mëkatet kanë ndikim të rrezikshëm në zemrat, sikur që helmi dëmton trupin dhe duhet patjetër të nxirret prej tij, kështu mëkatet ndikojnë në zemra me një ndikim të madh. Prej këtij ndikimi është ajo se mëkatet mbjellin mëkate të tjera si ato dhe i tërheqin motrat e tyre derisa i vështirësohet robit ndarja prej tyre dhe dalja nga to. Pra, vëlla i dashur shpejto tek pendimi i sinqertë dhe priti këto ditë larg nga mëkatet dhe shpeshtoje kërkimin e faljes dhe të përmendurit e Allahut, ngase askush nga ne nuk e di se kur do ta befasojë vdekja dhe do të shpërngulet nga kjo dunja.
Prej veprave të mira që nuk u pakësohet asnjëherë shpërblimi atyre që i bëjnë këto vepra në xhennet janë:
1. Shtimi i punëve të mira në përgjithësi, siç thotë i Dërguari i Allahut salallahu alejhi ve sel-lem: "Nuk ka prej ditëve më të mëdha tek Allahu si dhe punë më të dashur tek Ai, sesa në këto dhjet ditë. "
Ndër veprat e mira që disa prej njerëzve janë të pakujdesshëm: Leximi i Kur'anit, jepja e shumtë e sadakasë, shpenzimi për të gjorët, urdhërimi në punë të mira dhe largimi nga e keqja etj.
2. Namazi: Preferohet prezentimi i hershem në farze si dhe shpejtimi për në safin e parë. Shumimi i nafilëve, ngase ato janë gjërat, të cilat më së shumti të afrojnë tek Allahu. Transmetohet nga Thevbani [radijallahu anhu] se ka thënë: e kam dëgjuar të Dërguarin e Allahut salallahu alejhi ve sel-lem të thotë: "Shpeshtoje sexhden për Allahun ngase për çdo sexhde që i bie Allahut, Allahu të ngritë një shkallë dhe me të e fshin prej teje një mëkat." (Transmeton Muslimi), e ky rast është në çdo kohë.
3. Agjërimi: Sepse agjërimi bën pjesë prej veprave të mira. Transmeton Hunejde bin Halid nga gruaja e tij e kjo nga disa gra të Pejgamberit [sal-lallahu alejhi ve sel-lem] se kanë thënë: " I Dërguari i Allahut agjëronte nëntë prej dhul-hixh-xhes, ditën e ashurës si dhe tre ditë nga çdo muaj." (Transmeton imam Ahmedi, Ebu Davudi dhe Nesaiu)
Ka thënë imam Neveviu për agjërimin e dhjetë ditëve: "Ajo është shumë e preferuar." Kurse i Dërguari i Allahut salallahu alejhi ve sel-lem ka thënë: "Nuk ka rob, i cili agjëron një ditë për hirë të Allahut vetëm se Allahu e largon me këtë ditë fytyrën e tij nga zjarri shtatëdhjetë pranvera (vite)." (Mutefekun alejhi)
4. Kryerja e Haxhit dhe Umres
Nga fjala e Pejgamberit [sal-lallahu alejhi ve sel-lem]: "…dhe për Haxhin e pranuar nuk ka shpërblim tjetër përpos xhennetit." (transmeton Muslimi)
5. Tekbiri (thënia: Allahu Ekber), thënia: La ilahe il-lallah, dhe elhamdulilah
Siç është përmendur në hadithin e mëparshëm të Ibni Omerit [radijallahu anhu]: "Shpeshtone në këto ditë me fjalët: LA ILAHE IL-LAHE IL-ALLAH, me tekbire (Allahu Ekber) dhe me ELHAMDULILAH.
Ka thënë imam Buhariu: "Ibni Omeri dhe Ebu Hurejra [radijallahu anhum] gjatë këtyre dhjetë ditëve dilnin ne treg dhe thonin tekbire e bashkë me ta edhe njerëzit tjerë."
Gjithashtu thotë: "Omeri [radijallahu anhu] thonte tekbire te kupola e tij në Minna. Kështu që e dëgjojshin njerëzit në Xhami e atëhere edhe ata thonin tekbire. Po edhe njerëzit tjerë ne treg derisa dridhej Minna prej tekbireve."
Ibni Omeri [radijallahu anhu] në këto ditë thonte tekbire në Minna pas namazeve, thonte në shtratin e tij, në tëndën e tij, në mexhlisin e tij si dhe në të gjitha ecjet gjatë këtyre ditëve.
E preferueshme është ngritja e zërit me tekbire për burrat siç bënte dhe Omeri [radijallahu anhu], djali i tij dhe Ebu Hurejra. Kurse gratë gjithashtu thojnë tekbire por e ulin zërin, siç është cekur në hadithin e Atijes: "…Derisa dilnin dhe gratë me menstruacione e qëndronin pas njerëzve, merrnin tekbire me tekbiret e tyre dhe bënin dua me duatë e tyre…" (Transmeton Buhariu dhe Muslimi)
Është kënaqësi për ne muslimanët që ta ngjallim këtë sunnet, i cili është lënë pas dore në këto ditë, bile gati se nuk u harrua.
Tekbiri është dy llojësh: i përgjithshëm dhe i kufizuar. Komisioni i përhershëm për fetva ka lëshuar këtë fetva:
"Sipas sheriatit, në Kurban Bajramin ka tekbir të përgjithshëm dhe të kufizuar. Tekbiri i përgjithshëm është në çdo kohë prej fillimit të hyrjës së muajit dhul-hixh-xhe deri në fund të ditëve të Bajramit. Kurse tekbiri i kufizuar është pas namazeve farze, prej namazit të sabahut të Ditës së Arafatit deri në namazin e ikindis të ditëve të fundit të Bajramit. Në këtë dispozitë kanë aluduar të gjithë, si dhe e kanë vepruar sahabet (Allahu qoftë i kënaqur me ata).
Forma e tekbirit është:
A- Allahu Ekber, Allahu Ekber, Allahu Ekber kebiren
B- Allahu Ekber (2 herë), la ilahe il-lallah, vAllahu Ekber. Allahu Ekber ve lilahi elhamd.
C- Allahu Ekber (3 herë), la ilahe il-lallah, vAllahu Ekber. Allahu Ekber ve lilahi elhamd.
O Allah, na mundëso kryerjën e punëve të mira, na bën prej robërve të Tu të sinqertë.
- Haxhi -
Falënderimi i takon Allahut Zotit të botërave, ndërsa paqja dhe mëshira e Tij qofshin mbi të dërguarin e Tij Muhamedin [sal-lallahu alejhi ve sel-lem], familjen e tij si dhe shokët e tij.
Vëlla musliman, falenderoju Allahut [subhanehu ve teala], i Cili ta zgjati jetën që të dëshmosh kalimin e ditëve dhe muajve. Pra, nëse ke mundësi, merr iniciativë për vizitën e shtëpisë së Allahut [subhanehu ve teala] qoftë ky obligim apo vepër vullnetare.
Allahu [subhanehu ve teala] thotë:
"Aty ka shenja të qarta: vendi iIbrahimit, dhe kush hyn në te, ai i sigurt, Për hirë të All-llahut, vizita eshtëpisë (Qabes) ësht obligim për atë që ka mundësi udhëtimi te ajo, e kush nuk e beson (ai nuk e viziton); All-llahu nuk është i nevojshëm për (ibadetin që e bëjnë) njerëzit." [Ali Imran, 97]
Poashtu Allahu [subhanehu ve teala] thotë: "Dhe kryeni Haxhin dhe Umrën për hirë të Allahut" [El-Bekare, 196]
"Dhe thirr ndër njerëz për haxhin, se të vijnë ty këmbësorë e edhe kalorës me deve të rraskapitura që vijnë prej rrugëve të largëta." [El-Haxh, 27]
Vëlla musliman, Haxhi është një shtyllë prej pesë shtyllave të Islamit. I Dërguari i Allahut [sal-lallahu alejhi ve sel-lem] ka thënë: "Islami ndërtohet mbi pesë shtylla: dëshmia se nuk ka Zot tjetër përveç Allahut dhe se Muhamedi është i Dërguari i Tij, falja e namazit, dhënia e zekatit, vizita e Qabës si dhe agjërimi i Ramazanit." [Muttefekun alejhi]
I obligohet çdo muslimani që ta kryej Haxhin nëse ka mundësi para se të merr mëkat. Ka thënë Pejgamberi [sal-lallahu alejhi ve sel-lem]: "Shpejtone Haxhin ngase askush prej jush nuk e din se çfarë do t'i paraqitet atij" (prej pengesave)." [transmeton Ahmedi]
Ndërsa transmetohet nga Abdurrahaman Sabit: "Kush vdes e nuk e ka kryer Haxhin, dhe nga kjo nuk e ka ndalur ndonjë sëmundje izoluese, apo mbret i padrejtë, apo ndonjë nevojë e dukshme, atëherë lë të vdes në cilëndo gjëndje: Jehudi apo krishterë!"
Kurse Omeri [radijallahu anhu] ka thënë: Kam dashur që t'i dërgoj disa njerëz tek këto qytete që të shiqojnë çdonjërin, i cili ka pasuri dhe nuk e kryen Haxhin, që t'ua caktojnë Xhezjen (tatimin) sepse ata nuk janë muslimanë... nuk janë musliman!" [transmeton Bajhekiu]
Pra, është obligim për ty vëlla musliman iniciativa dhe shpejtimi për kryerjen e këtij obligimi të rëndësishëm, sepse çështja është e lehtë, e për këtë falënderimi i takon Allahut. Mos të të habisin ty shpresat. Pyete vetën: Deri kur kështu duke e shtyer Haxhin për vitin tjetër? A thua, kush e di ku je ti në vitin tjetër, përmbi dhe apo nën dhe?! Mendo pak në gjendjen e gjyshërve se si e kryenin Haxhin në këmbë, e kështu ata udhëtonin muaj dhe netë të tëra për të arritur deri te shtëpia e lashtë (Qabja)!
Disa njerëz i pengon shejtani me disa arsye të dobëta. Kështu e sheh atë duke e shtyrë vit pas viti duke u arsyetuar me nxehtësinë e madhe si dhe me turmen e madhe që bëhët. E nëse është kështu pra thuaj: Kur është ditur ndonjëherë për ditët e Haxhit, të jetë e kundërta e kësaj?!
Vëlla musliman, vërtetë rëndësia e Haxhit është e madhe si dhe shpërblimi i tij është i begatshëm. Tek ai bashkohet adhurimi me trup dhe pasuri. E para është: Lodhja, mundimi, largimi nga familja, e dyta: Të hollat të cilat i shpenzon haxhiu për këtë.
Ka thënë Pejgamberi [sal-lallahu alejhi ve sel-lem]: "Kush kryen Haxhin dhe në këtë kohë nuk i afrohet gruas e as nuk merr shkelë dispozitat e Sheriatit, kthehet (nga Haxhi) sikur ditën që e ka lindur nëna e tij." [Muttefekun alejhi]
Eshtë pyetur Pejgambri [sal-lallahu alejhi ve sel-lem] se cila është vepra me e mirë? Ai tha: Besimi në Allahun dhe të Dërguarin e Tij, pastaj cila? Tha: Xhihadi në rrugën e Allahut: Pastaj cila? Tha: Haxhi i pranuar." [transmeton Buhariu]
Pejgamberi [sal-lallahu alejhi ve sel-lem] ka nxitur në shtimin e punëve të mira dhe vijimin e Haxhit dhe Umrës. Ka thënë: "Vijoni ndërmjet Haxhit dhe Umrës, sepse ato dyja ndalojnë varfërinë dhe mëkatet siç largon gjyryku i farkëtarit të këqijat e hekurit, arit dhe argjendit, dhe për haxhin e pranuar nuk ka shpërblim tjetër përpos xhennetit." [transmeton Ahmedi dhe Tirmidhiu]
Gjithashtu ka thënë: "Prej kryerjes së Umres deri te Umreja tjetër është shlyese e mëkateve që janë mes tyre. Kurse për Haxhin e pranuar nuk ka shpërblim tjetër përpos xhennetit." [transmeton Muslimi]
O ti i cili ke vendosur të kryesh Haxhin, të përgëzoj me një ditë të madhe, në të cilën shuhen gabimet dhe falën mëkatet. Pejgamberi [sal-lallahu alejhi ve sel-lem] ka thënë: "Nuk ka ditë, të cilën Allahu e shpëton robin më së shumti nga zjarri se sa dita e Arafatit." [transmeton Muslimi]
Pra, uroje vetën tënde, rehatohu dhe përgaditu për takimin me Allahun [subhanehu ve teala], dhe shfrytëzoje kohën tënde në dobinë e së cilës të kthehet në botën tjetër. Mu ajo do të gëzojë ty ditën kur nuk bënë dobi pasuria e as të afërmit… ditën kur shpërndahen librat, e dridhen dhe ndryshohen zemrat, e i sheh njerëzit të dehur e ata nuk janë të dehur por dënimi i Allahut është i rëndë. Ndërsa disa të tjerë -me keqardhje- udhëtojnë në këto ditë dhe shpenzojnë pasuri, durojnë mundimet e kësaj shëtitje ose për turizëm dhe kështu e ndalon vetën nga kryerja e Haxhit dhe shpërblimi i tij.
Vëlla musliman, puno për këtë botë në përmasë të qëndrimit tënd në të, e edhe për botën tjetër gjithashtu! Mos jeto në shpresa, sepse vdekja është para teje, sëmundja po të troket kurse angazhimet të pasojnë gjithnjë. Mirëpo, largë nga e gjithë kjo, kërko ndihmë prej Allahut dhe mbështetju Atij dhe bëhu prej atyre, të cilët në këtë vit thonë: Lebbejke Allahumme lebbejke - Të përgjigjemi o Zoti ynë të përgjigjemi.
Ndërsa kujt nuk i mundëdohet Haxhi ai është siç ka thënë njëri prej selefëve: Kujt i ka kaluar qëndrimi në Arafat këtë vit, le të qëndrojë për Allahun në hakun e Tij, të cilin e njeh atë. Kush nuk ka mundur që të flej në Muzdelife, sajoje vendosmërinë tënde për punë të mira. Kush nuk mundet të arrijë në Mina, le të pres epshin e tij këtu. Kush nuk mund të arrijë te Qabeja ngase ai është larg prej atij le t'i drejtohet Zotit të Qabes sepse Ai është më afër atij që i lutet se sa damari i qafës.
O Allah ndihmona në përmendjen, falënderimin dhe adhurimin Tënd. Ndihmoju haxhive dhe atyre që kryejnë Umren, dhe na mundëso që të marrim pjesë në punët e mira!
Së fundi përshëndetjet qofshin mbi të Dërguarin tonë, Muhamidin [sal-lallahu alejhi ve sel-lem], familjen dhe shokët e tij.
